Чыамайыкы оһуохайын тутуһуутун, хаамыытын сурукка бигэргэтии

Муус устар 9 күнүгэр Чыамайыкыга сэргэх күн буолла.
Ол курдук Чыамайыкылыы оһуокай тула энтузиастар, норуот айымньытын пропагандистара, үҥкүү тылын этээччилэр мустан аһаҕастык кэпсэттибит, Оһуокай түмсүүтүн тэрийэн бу сыллааҕы үлэ былаанын торумнаатыбыт. Модератор, биир дойдулаахпыт, тыл билимин хандьыдаата Елена Афанасьевна Архипова оһуокай быһаарыытын, тутулун чопчулаата уонна Чыамайыкылыы оһуокай балаһыанньатын оҥорон, уратыларын чопчу бэлиэтииргэ кэккэ этиилэри оҥорбутун мустубут дьон биһирии иһиттэ. Өбүгэлэрбит, былыр-былыргаттан хайдах үҥкүүлээбиттэрин ахтыстыбыт, Чыамайыкылыы оһуокай историятын кэпсэтэн бастыҥ оһуокайдьыттарбытын ахтан-санаан аастыбыт. Оһуокайбыт сүрүн элеменнэрин чопчулаһан быраактыкаҕа хайдах буоларын бигэргэтэн, итиэннэ бачча түмсэн баран диэммит оһуокайдаан ойдубут, эппит-сииммит тэнийэн бары да дуоһуйуохпутугар диэри көттүбүт. Манна даҕатан эттэххэ, Чыамайыкылыы оһуокай биир сүрүн уратыта, киэргэлэ - ойутуута (көтүтүүтэ) буолар: һойда-һоккай, һэйда-һэккэй диэн араас тональноһынан хас да киһи урут-хойут түһэрсэн иһиилэрэ, биир тэҥник иһирдьэ-таһырдьа үктэнэн ойутарбыт буолар. 10-15 мүнүүтэ тохтоло суох ойдоххо сылайыахтааҕар сэниэ эбиллэрэ дьэ дьикти. Сахалыы таҥастаах оҥостон кэлбит дьон дьиҥ чыамайыкылыы оһуокайдыы сылдьара көрүөххэ да, истиэххэ да кэрэ көстүү! Оһуокай тылын Егор Евсеевич Куприянов таһаарда, кынаттара хабан ылан өргө диэри оһуокайбыт дуорайда. Биир ыйынан Кыайыы оһуокайгар, онтон ыһыахха көрсөн оһуокайдыахпыт диэн үөрэн тарҕастыбыт.